Jonah 1
Yona'a ataleno aune hetaleno u'niya gemae
1Ala kava ne'mo'a Yona'mo Amitai mafa'nee'mo ha paino'ae'mo, 2Alo huka alopa taonimo Niniva taonifi'mo uka ge hapauvo. Lusi hosu kava'mo nehage'na apake'nove, huno ha pai'niya'monanafa 3Yona'a Ala kava netegati'mo ataleno aune hetaleno Tasisi taonifi'mo ugefe'mo hu'niye. Ataleno uno Yopa taonifi'mo lamino Tasisi taonifi'mo ugefe hu'niya sipimo miya faiteno sipifi'mo haino mai'niye. Yona'a Ala kava netegati'mo ataleno aune hetaleno u'niye.4Aune hetaleno ne'vigeno'ae'mo Ala kava ne'mo'a lusi lokiya yasimo alino ate'nigeno solovala anite'mo alinino e'niye. Lusi yasimo alige ko aige hu'nigeno ani'mo'a aino holakau holakau huno sipimo aeno atava aisiya agufa kava'mo hu'niye. 5Sipifi'mo ali'ya ne'aliya vaya'mogi lusi kava hu'a apamo'ya ai'a hapausoli hute'apae'mo goti'apimogife'mo apamete apamete hu'a, laha mao laha mao, hu'a keya ae'nae. Sipimo'mo kana osisiyafe'mo sipifi'mo hane'niya kagemi ya'mo ali'a anipi'mo yaga au'a atale'nae. Ani kava hu'nageno'ae'mo Yona'a anagamo o'mai'nifa sipimo afepilagamo lamino au kaleno mai'niye.
6Sipifi'mo ali'ya ne'aliya vaya'aite'mo yagaino ne'apateya vekamo'a ageyana Yona'a afa'age'mo au kaleno mai'nigeno ageteno'ae'mo, Na kava higekae'mo kau kaleka mai'nane. He tika kagaika gotikamofe'mo keya aeka ge huvo. Ofalisunafe'mo afiteno laha maesifi laha o'maesifigi ge huka afi go, huno ha pai'niye.
7Sipifi'mo ali'ya ne'aliya vaya'mogi apakai'api apakai'apimo hu'apae'mo, Lagitimo avo'mo kaeteta kupi'mo ai male'neta kupati'mo ina la agimo alisupi mani ne'aluna hanageke ya'mo aepa vekamo agaemae, huta agegaune, hu'a hu'nae. Ani kava hute'a Yona agimo ali'nae. 8Apakaemo Yonafe'mo, Mani ne'aluna hanageke ya'mo aepa veka'amo ina la'ae. Na kava higekae'mo sipifi'mo mai'nane. Kagaemo haiya kotega vekamo mai'nane. Haiya nofi vayapati vekamo mai'nane, hu'a loka hu'a afi ge'nae. 9Afi ge'nageno'ae'mo, Himulu nofi vekamo mai'nove. Ala kava ne'mo koku'napi ne'maiya Goti'mo solovala ani'e mopa'e'mo alo hu'niya Gotife'mo mono nehuva vekamo mai'nove huno hapa pai'niye. 10Ani gemo afite'apae'mo sipifi'mo ali'ya ne'aliya vaya'mogi lusi kava hu'a apamo'ya aite'a, Kagaemo lusi hosu kava'mo hu'nane, hu'a ha pai'nae. Hogoteno yasimo o'ali'nigeno'ae'mo Yona'a, Nagaemo Ala kava netegati'mo atale'na naune hetale'na ne'ove, huno hapa pai'nige'a ago afi'naya'mofe'mo lusi hosu kava'mo hu'nane, hu'a ha pai'nae. 11Solovala ani'mo'a lusi kava huno ayamukiki huno mago'e mago'e huno aino holakau holakau hu'nige'apae'mo sipifi'mo ali'ya ne'aliya vaya'mogi Yonafe'mo, Kagaetegamo na kava hisunageno ani'mo afa'a hanesigeta ugune, hu'a afi ge'nageno 12Yona'a, nasagautapa yaga auta natalegeno'ao ani'mo afa'a haneno, huno hapa pai'niye. Ago afi'novana ani'mo'a lapakaetegamo lusi kava huno aino holakau holakau nehiya kava'mo aepa vekamo nagaeke'mo mai'nove, huno hapa pai'niye.
13Sipifi'mo ali'ya ne'aliya vaya'mogimo ani agi'nale'mo visayafe'mo latapa kayoteti'mo apaya mukiki hu'a ani'mo avale'a apakamelaga ataleme ataleme u'nayana ani agi'nale'mo malage hu'a o'u'nageno yasimo alige ani'mo'a mago'e mago'e huno aino holakau holakau huge huno mai'niya'mofe'mo afa'a o'u'nae. 14Apakaemo Ala kava nefe'mo, Ala kava nene, hu'a, Mani vekamo asagauta anipi'mo yaga auta atalegauna'mofe'mo ani kava'mo anona'atimo alagi olategeta afa'a maino. Vaya'mo ne'apamagiya vaya'mo agoti huka ne'apatana kava huka agoti huka olato. Ala kava nene, Kagaemo ani kava'mo alika lave li'nane, hu'a ha paite'a 15Yona'mo asagau'a anipi'mo yaga au'a atale'nageno'ae'mo ani'mo aino holakau holakau osuno afa'a hane'niye. 16Sipifi'mo ali'ya ne'aliya vaya'mogi ani kava'mo agete'apae'mo Ala kava nefe'mo lusi kava hu'a koli hute'a afumo amagi'a Goti'mo ofalinimo amite'a mago alagepa kava'mo hisayafe'mo magoke magoke vaya'mogi, ina kava hugune, ma kava hugune, hu'a hute hute hu'nae. 17Ala kava ne'mo'a alopa noyamemo alino ate'nigeno uno aka hu'neno Yona'mo alino nakaitalegeno lamino lole'e mago'e feluga'e hani'ilaga'e'mo noyamemo agupafi'mo mai'niye.
Copyright information for
KYG